En Braña l’eire y la torba
y la tona en Rexoniles;
en Pedrafita los l.lobos
y en Col.lanzo los civiles.

Paso la vída nel monte
ente penas y gorbizos;
soi emu de las l.lamargas
y del l.laz de los caminos.

Vivo cola muerte al l.lumbu
y el fusil a xocostrinas;
probe del home que pierde
la guerra y salva la vída.

Penas onde manda l’éliga,
montes y so las maeas,
puertos que naide camina;
aende ta la mio xacea.

Nuna vuelta de la sienda
ta esperándome una bala;
la goyá de los fusiles
sígueme pente las fayas.

Esconsona la mimosa
sal-ye flor a la xiniesta;
pal home que s’echa al monte
nunca acabará la guerra.

Al baxar el Puirtu Braña
tán escritas estas l.letras:
“Asturias, l.levanta’l puñu
pa baltar al que t’afuega”.

Anuncios