2004 borbonparmamariateresavisitapalestinaarafatLa Voz de Asturias (02/11/2005)

José Luis Piquero

Quién lo diba dicir: una princesa española, una Borbón, va tar na manifestación convocada pal prósimu 5 de payares en favor de la llingua asturiana. Entendámonos: nun va tar en persona pero estampó la so firma nel manifiestu del Conceyu Abierto pola Oficialidá (CAO), lo que ye tan valioso o más que figurar físicamente ente la multitú (esperemos que seya una multitú). Ella ye María Teresa de Borbón Parma.

Nun ye la primer vez que traemos a estes páxines la historia del carlismu y la so defensa de les identidaes rexonales. El carlismu nació a primeros del sieglu XIX como un movimientu dinásticu y social. Axuntaba a les capes más populares de la población y a los sectores más reaccionarios de la Ilesia alredor del pretendiente al tronu Carlos María Isidro, hermanu de Fernando VII. A lo llargo de dos guerres civiles, el carlismu intentó consiguir el poder ensin llogralo, llegando a dominar parte del territoriu nacional y estableciendo un mini-estáu propiu dientro d’España, con sé n’Estella, moneda propia y instituciones de gobiernu. Yá nel sieglu XX, el carlismu sofitó al bandu nacional, una ayuda que Franco “agradeció” al final de la contienda fundiendo’l tradicionalismu carlista cola Falanxe. Nos años 60, l’heriede de la lexitimidá carlista, Carlos Hugo de Borbón Parma, empobinó al movimientu hacia la esquierda, consolidando un programa de socialismu autoxestionariu y federalista mui respetuosu pa colos rasgos diferenciales de les comunidaes históriques.

Porque, al pesar de la trayectoria reaccionaria del carlismu na so etapa más floreciente, esti movimientu siempre tuvo una base popular, de defensa de los fueros como signu de llibertá énte’l corruptu centralismu lliberal. Carlos Hugo encauzó esa base hacia posiciones progresistes y neso siguen los carlistes: nel afianzamientu democráticu, nel humanismu, na anti-globalización, nel respetu a la diferencia dientro de la xunidá.

María Teresa de Borbón Parma, conocida como “la Princesa Roja”, hermana de Carlos Hugo, socióloga, profesora y escritora, en consonancia con esi ideariu carlista, va tar el vienres día 5 apoyando al asturianu. Un sofitu que tien un inmensu valir real y simbólicu, masque dalgunos nun quieran velo.

Anuncios