rivas

Fragmentu de la entrevista d’Alberto Elías coincidiendo cola presentación del primer llibru lliterariu de David M. Rivas “Xente perende” nel so Conceyu. (Infoasturies, avientu 2006).

A.E.: Diz Pin que la so familia fora metada carlista y metada lliberal. ¿Con qué metada se quedaría?.

D.M.R.: Munches vegaes nun mos damos cuenta pero les guerres carlistes marcaron fonderamente los calteres de tolos pueblos al norte’l Dueru. Con guerra o ensin ella, quitando Bilbáu y Xixón, too yera simpatía pol carlismu. Nun ye fácile arrepostiar a la so entruga porque ta llevándome a los años sesenta’l sieclu XIX. Yo identifícome más col lliberalismu dende un puntu d’agüeye ideolóxico pero siempres sentí polos carlistes un ciñu mui especial. Camiento que foran la cabera manifestación d’un ciertu romanticismu medieval col que toi identificáu dende’l trubiecu. Dende’l presente tan confusu nun podemos por menos qu’almirar cómo hebo xente que, hasta cuasi’l sieclu XX, peleó por Dios, pola patria y pol rei, anque nel 1936 francieran cualesquier romanticismu pa cayer na criminalidá más alloriante. (…) Pero si tornamos al clasicismu y dexamos de llau a los fíos faches, amidía que pasa’l tiempu, voi teniendo más simpatíes pola causa carlista. Los lliberales d’entóncenes yeren unos xacobinos de cuidao, centraliegos ya estremistes hasta dicir basta. Los carlistes yeren catolicones pero respetaben les llibertaes de los conceyos y teníen una idega mui clara de lo que yera una nación. Los mesmos Marx ya Engels, nel so llibru Revolución n’España, aponderen el carlismu como movimientu popular y nun son pocos los anarquistes –Eleuterio Quintanilla pente ellos- qu’alcuentren nos vieyos carlistones munches virtúes cíviques ya un fundamentu de solidaridá que nun teníen los cristinos, dempués llamaos isabelinos. En dalgunes custiones, los carlistes foran más modernos que los lliberales, lo mesmo que pasara colos austracistes escontra los borbónicos un sieclu enantes.

Voi cuntá-y una cosa. Cuando yo yera pequeñu –y teo un güelu militar afusiláu por Franco ya otru que fora dirixente anarcosindicalista- canciábamos na xinta San Bartolu, en Quintueles, una parroquia de la costa maliayesa, cancios carlistes, cancios que, taba clariquino, mos veníen de familia. A ver si me recuerdo: que viva’l rei/que viva don Carlos/que viva’l rei/que n’Asturies tien partidarios; si me lleven prisioneru/nun me lleven por lladrón/llévenme por defender/a don Carlos de Borbón. Canciábamos a gritu peláu, pegando puñetazos na mesa y llevantando los vasos.

Anuncios